QARABAĞ FUTBOL KLUBU
Qarabağ TV
TPL
UEL
Klublarımızın Avropa səyahəti: yenə “Qarabağ” yenə öndədir (qol.az)
UEFA-nın yeni klub reytinqi açıqlanıb. Qol.Az-ın məlumatına görə, bu mövsüm 3 mərhələ keçməyi bacaran yeganə komanda olan “Qarabağ” təmsilçilərimiz arasında ən yaxşı nəticə göstərib. Bu il öz reytinqinə 1,900 xal əlavə edən ağdamlılar son 5 mövsümün nəticələrinə əsasən 4,233 xala malikdir. Bu isə Avropada 215-ci nəticədir.
Komandalarımız arasında ikinci olan “Bakı” 3,233 xalla “Qarabağ”dan 36 pillə geri qalır. Siyahıda yer alan 365 komanda sırasında daha 3 təmsilçimiz var. “İnter” 2,483 xalla 271-ci, “Xəzər Lənkəran”la “Simurq” isə 1,483 xalla 320-322-ci yerlərdə qərarlaşıblar.
Bundan başqa, cari mövsümün də reytinqi açıqlanıb. Bu yay hesabına 1,900 xal əlavə edən “Qarabağ” Şotlandiya klubları “Seltik”, “Motervell”, “Dandi Yunayted” və Belçika “Genk”i ilə 106-110-cu yerləri bölüşür. 131-136-cı yerlərə şəriklər arasında qərarlaşan “İnter”in hesabında 1,400, 177-ci olan “Bakı”nın 0,900, 198-ci olan “Xəzər Lənkəran”ın 0,650 xalı var
Bütövlükdə isə Azərbaycan 2010/11 mövsümünü 2,000 xalla başa vurub. Qeyd edək ki, bu, qitədə 24-cü nəticədir. Polşa, Belçika və Şotlandiya ilə birlikdə 24-27-ci yerləri bölüşən ölkəmiz şəriklərindən fərqli, təmsilçilərini itirdiyindən mövqeyini pisləşdirə bilər. Çünki həmin 3 ölkə ilə yanaşı, bizdən az xal toplayan Rumıniya, Moldova, Çexiya və Norveç də hələ çıxışını davam etdirən komandaya malikdir. Lakin bu 7 ölkənin hamısını qabağa buraxacağımız halda belə, mövsümü ən azı 31-ci pillədə bitirəcəyik. Son 5 ilin əmsallarına əsasən, 6,165 xalı olan ölkəmiz elə pley-off mərhələsi ərəfəsində olduğu kimi 37-ci yerdə qaldı. Bu isə 2012/13 mövsümü üçün klubların bölüşdürülməsində nəzərə alınacaq. Azərbaycandan geridə olan 16 ölkənin də təmsilçilərinin hamısını itirməsi isə bu pilləni əldən verməyəcəyimizi göstərir.
Qeyd edək ki, klublarımızın mübarizəyə qoşulacağı yeni – 2011/12 mövsümündə ölkəmiz 38-ci pillədən başlayacaq. Çünki 2006/07 mövsümünün nəticələri silindikdən sonra əmsalımız 4,832 olacaq.